Објекти во селото

Како прв капитален објект во селото може да се каже дека Хидроцентралата на Гарска река претставуава една од  најзначајните инвестиции во селото. Во далечната 1949 година е пуштена во употреба и во тоа време претставувало голема радост на селаните.

Благодарение на Селската Задруга во 1956-1957 година изграден е поголем објект на влезот во селото здружениот дом-Килимарата. Овој објект располагал со Килимарска работилница за текстилни производи,работилница за млечни производи, магацински простории и административно-управни простории. Зградата на Килимарата е во добра кондиција до ден денес каде што во Св.Јовановата сала веќе 25 години се собираат мештаните за празникот Водици кој се одбележува традиционално во селото. Капацитетот е за 250 луѓе, опремена со кујна, тоалет и греење.

Во 1958 година почнала изградбата на уште еден крупен објект–селскиот водовод. Градбата на овој објект ја извеле Задругарите. Со прекопување на каналите од изворот Глава и со развивање на водоводната мрежа во селото било донесено вода до секоја куќа во селото.

На средселото изграден е Пензионерскиот дом-Стогово каде што моментално е сместена продавница. Продавницата работи само во летниот период и е снабдена со основните продукти. Домот служел за грижа на старите лица. Во касните осумдесетти  имало и кујна која што била 365 дена во годината отворена за  да им се олесни животот на пензионерите преку целата година. Редовно имало и медицински контроли. Во домот има и 4 соби за спиење.

Во 1927 година изградена е полициската Станица која и денеска постои. Се наоѓа од другата страна на реката блску до селските гробишта. Во нејзе се сместени кираџии и е добро сочувана.

Првото училиште се споменува во 1864 година и на почеток учителот ги изучувал децата во својот дом. Имал околу 20-30  ученици. Околу 1900 година направено е првото училиште, но условите за работа и понатака биле тешки. Наставата се изведувала без никакви средства, а наместо клупи децата се собирале во круг со вкрстени нозе, а учителот бил во средината. Во учебната 1947/48 година направено е новото училиште кое го носи името Гоце Делчев. Располагало со 4 големи училници, три мали училници, канцеларија и два пространи ходници. Подрумските простории се користеле за училишната кујна и трпезарија. Во одреден период бројот на ученици достигнал 130 деца. Имало ученици и од околните села Осој и Могорче. Зградата во која се наоѓало училштето Гоце Делчев и ден денес е во добра состојба и Гарчани се грижат за нејзината функционалност. Моментално е под наем.

За успешно развивање на културниот и забавен живот во селото било набавено кино апаратура која била сместена во младинксиот дом и Гарчани имале можност два пати во неделата да гледаат филмска програма. Во селото постоело и Културно уметничко друштво кое го носело името Стогово исто како и фудбалскиот клуб. Дневниот печат во селото редовно се примал а имало и библиотека со преку 2000 книги.

Треба да се напомене дека за време на Задругата овчарството и килимарството го достигнуваат својот максимум. Имало преку 15.000 грла овци и се произведувало познатото Гарско сирење и кашкавал. Килимарницата работела во полн капацитет, а килимите  се пласирале на странските пазари. Исто така се произведувале јамболии, жеснки шамии и машки шалчиња.